मुंबई : मनोरंजनाची चौकट न मोडताही आशयपूर्ण आणि जीवनाशी जवळीक साधणारे चित्रपट प्रेक्षकांच्या पसंतीस उतरताहेत. ‘पिकोलो’ या मराठी चित्रपटाच्या ‘ संगीतमय’ चित्रचौकटीतून एका कलावंताच्या भावविश्वाचा प्रवास सुरेखरित्या उलगडण्यात आला आहे. जगण्याची प्रेरणा देणारा आशय, सुंदर कथा, अभिनयाने मोहून टाकणारे निरागस चेहरे आणि सुश्राव्य संगीताची जोड म्हणजे ‘पिकोलो’. फोर्टिगो मोशन पिक्चर प्रा.लि. प्रस्तुत आणि अभिजीत मोहन वारंग दिग्दर्शित ‘पिकोलो’ चित्रपटाची निर्मिती राजेश मुद्दापूर यांनी केली आहे. २६ जानेवारीपासून‘पिकोलो’चित्रपटगृहात प्रेक्षकांच्या भेटीला आला आहे.
‘पिकोलो’ संगीतप्रेमी कलावंताची गोष्ट आहे. संगीताच्या साथीने जगण्याची नवी उमेद निर्माण करणारा हा कलावंत संगीतसाधनेत येणाऱ्या अडथळ्यांवर मात करत आपली कला कशी जिवंत ठेवतो ? त्यासाठी त्याला कोण आणि कशी मदत करतो ? हे ‘पिकोलो’मध्ये पहायला मिळणार आहे. आनंदाने कसे जगावे, याचा मूलमंत्र देणारा हा चित्रपट आहे. या चित्रपटात मध्यवर्ती भूमिकेत असलेले प्रेमीयुगुल जगण्याच्या संघर्षावर संगीताची फुंकर घालून त्यातून कसा मार्ग काढतात ? हे पाहणे रंजक ठरते.
प्रणव रावराणे आणि अश्विनी कासार मध्यवर्ती भूमिकेत आहे. ‘पिकोलो’ चित्रपटात किशोर चौघुले, अभय खडपकर, दीक्षा पुरळकर, नमिता गावकर, पद्मा वेंगुर्लेकर, विश्वजीत पालव, मिलिंद गुरव, हर्षद जाधव, रघु जगताप, रोहन जाधव, हर्षद राऊळ, शुभम सुतार, हर्षद परब, विद्याधर कार्लेकर आदी कलाकारांच्या भूमिका आहेत. चित्रपटाची कथा प्रमोद शेलार, छायाचित्रण कार्तिक परमार, संकलन पराग सावंत, संगीत आणि ध्वनीरचना आनंद लुंकड, कला दिग्दर्शन नरेंद्र भगत यांचे आहे. असोसिएट प्रोड्युसर सागर म्हात्रे, कार्यकारी निर्माते राजू आर के झेंडे असून चित्रपटाचे वितरण फिल्मास्त्र स्टुडिओ यांनी केले आहे.