मुंबई: मधुमेह संशोधनासाठीच्या मद्रास डायबेटिस रिसर्च फाउंडेशनच्या (MDRF) नव्या अभ्यासाने उघड केले आहे की, रोजच्या आहारात भाजलेले, मीठ नसलेले पिस्ते (सुमारे ३० ग्रॅम) भोजनाच्या आधी खाल्ल्यास, प्रीडायबेटिस असलेल्या व्यक्तींमध्ये टाईप २ मधुमेहाचा धोका कमी होऊ शकतो.
हा अभ्यास ‘एशियन इंडियन प्रीडायबेटिक प्रौढांमध्ये प्रीमील पिस्ता पूरक आहाराचा कार्डियोमेटाबोलिक जोखमीवर परिणाम: एक नियंत्रित चाचणी’ या नावाने द जर्नल ऑफ न्यूट्रिशन मध्ये प्रकाशित झाला आहे. या संशोधनाचे नेतृत्व डॉ. वी. मोहन, चेअरमन, मद्रास डायबेटिस रिसर्च फाउंडेशन यांनी केले असून, हार्वर्ड टी.एच. चान स्कूल ऑफ पब्लिक हेल्थ (अमेरिका) येथील डॉ. वॉल्टर विलेट, डॉ. फ्रँक हू आणि डॉ. शिल्पा एन. भुपथिराजू तसेच युनिव्हर्सिटेट रोवीरा आय व्हिर्जिली, स्पेन येथील डॉ. जोर्डी सालास-साल्वादो यांच्यासह आंतरराष्ट्रीय संशोधकांचा सहभाग आहे. भारतामध्ये १३६ दशलक्ष प्रीडायबेटिक आणि १०१ दशलक्ष मधुमेही प्रौढ आहेत, त्यामुळे प्रभावी आहार उपायांची अत्यंत गरज आहे.
डॉ. वी. मोहन म्हणाले, ‘१२ आठवड्यांच्या या चाचणीमध्ये १२० प्रीडायबेटिक व्यक्तींचा समावेश करण्यात आला. दररोज न्याहारी व रात्रीच्या जेवणाच्या आधी ३० ग्रॅम पिस्ते सेवन केल्याने, ग्लायकोसिलेटेड हिमोग्लोबिन पातळी व जेवणानंतरच्या रक्तातील साखरेचे प्रमाण कमी झाल्याचे दिसून आले. तसेच, वजन कमी झाले, ट्रायग्लिसराइड्समध्ये १०% घट झाली आणि कंबरेचा घेर कमी झाला, ज्यामुळे टाईप २ मधुमेहाचा धोका टाळता येऊ शकतो.’
डॉ. शिल्पा एन. भुपथिराजू यांनी स्पष्ट केले की, आहारात पिस्त्यांचा समावेश केल्याने कार्बोहायड्रेटचे प्रमाण कमी होते आणि प्रथिने व निरोगी चरबीचे प्रमाण वाढते. भारतीय आहारात जवळपास निम्मे कॅलरी परिष्कृत तांदळातून मिळतात. त्यामुळे, त्यातील काही प्रमाण पिस्त्यांसारख्या पौष्टिक घटकांनी बदलल्यास आहाराची गुणवत्ता सुधारू शकते आणि मधुमेहाचा धोका कमी होऊ शकतो.
सुमित सरन, इन-कंट्री मार्केट प्रतिनिधी, अमेरिकन पिस्ताचिओ ग्रोअर्स, म्हणाले, ‘भारत हा अमेरिकन पिस्त्यांसाठी एक मोठा बाजार आहे. भारतात पिस्त्यांचे व्यावसायिक उत्पादन होत नाही. अमेरिकन पिस्ते आता देशभरातील कोरड्या फळांच्या विक्रेत्यांकडे तसेच प्रमुख ई-कॉमर्स प्लॅटफॉर्मवर सहज उपलब्ध आहेत. ते अनेक भारतीय ब्रँडद्वारे पॅक व विकले जातात. ग्राहकांनी फक्त ‘कॅलिफोर्निया पिस्ते’ शोधून आपल्याला हवे असलेले ब्रँड निवडायचे आहेत.’