मुंबई:संदीप मोहिते-पाटील प्रस्तुत आणि उर्विता प्रोडक्शन निर्मित ‘धर्मरक्षक महावीर छत्रपती संभाजी महाराज’ या बहुप्रतिक्षित चित्रपटाच्यानिमित्ताने, चित्रपटाचे निर्माते संदीप रघुनाथ मोहिते-पाटील यांनी छत्रपती शिवाजी महाराज यांचे वारसदार श्रीमंत छत्रपती उदयनराजे भोसले महाराज साहेब आणि आमदार शिवेंद्रसिंह राजे भोसले महाराज साहेब यांची खास भेट घेऊन, चित्रपटाच्या ट्रेलरचे प्रथम सादरीकरण त्यांच्यासमोर करण्यात आले.
श्रीमंत छत्रपती उदयनराजे भोसले महाराज साहेब व शिवेंद्रसिंह राजे भोसले महाराज साहेब यांनी ट्रेलर पाहून या चित्रपटाचे कौतुक केले आणि चित्रपटाच्या टीमला पुढील वाटचालीसाठी शुभेच्छा दिल्या. ट्रेलर पाहाताना अंगावर अक्षरशः शहारा आल्याची प्रतिक्रियाही त्यांनी यावेळी दिली. महाराजांच्या शौर्याचा आणि धर्मरक्षणासाठी दिलेल्या बलिदानाचा सन्मान करणारा हा चित्रपट नव्या पिढीपर्यंत पोहोचेल, असा विश्वासही यावेळी त्यांनी व्यक्त केला.
निर्माते संदीप मोहिते-पाटील म्हणतात, ‘छत्रपती संभाजी महाराजांचा जीवनप्रवास म्हणजे धैर्य, त्याग आणि निष्ठेचा एक महान अध्याय आहे. आज आदरणीय श्रीमंत छत्रपती उदयनराजे भोसले महाराज साहेब आणि शिवेंद्रसिंह राजे भोसले महाराज साहेब यांना भेटून त्यांना ट्रेलर दाखवणं माझ्यासाठी एक भावनिक आणि अभिमानास्पद क्षण होता. त्यांनी आमच्या कामाचे कौतुक करत आशीर्वाद दिले, हा क्षण माझ्यासाठी स्वप्न पूर्ण होण्यासारखा आहे. त्यांच्या आशीर्वादाने आम्हाला अधिक आत्मविश्वास मिळाला आहे.’
दिग्दर्शक तुषार शेलार म्हणतात,’संभाजी महाराजांचे जीवन म्हणजे प्रेरणादायी पराक्रमाची गाथा आहे. ट्रेलरमध्ये त्यांच्या जीवनातील काही महत्त्वाचे प्रसंग मांडले आहेत. आदरणीय श्रीमंत छत्रपती उदयनराजे भोसले महाराज साहेब आणि शिवेंद्रसिंह राजे भोसले महाराज साहेब यांनी दिलेला आशीर्वाद हा आमच्यासाठी खूप महत्त्वाचा आहे.’
संदीप रघुनाथ मोहिते-पाटील प्रस्तुत, आणि उर्विता प्रोडक्शन निर्मित या चित्रपटाची निर्मिती शेखर मोहिते-पाटील, धर्मेंद्र बोरा, सौजन्य निकम, आणि केतन राजे भोसले यांनी केली आहे. चित्रपटात अभिनेता ठाकुर अनुप सिंग, अमृता खानविलकर, किशोरी शहाणे, भार्गवी चिरमुले, आणि मल्हार मोहिते-पाटील यांचा उत्तम अभिनय पाहायला मिळेल. ‘धर्मरक्षक महावीर छत्रपती संभाजी महाराज’ हा चित्रपट येत्या २२ नोव्हेंबर २०२४ ला भव्य प्रेक्षकांच्या भेटीस येत आहे.