मुंबई: जुहू उपनगर शिक्षण मंडळ संचलित विद्यानिधी मराठी माध्यमाच्या माध्यमिक शाळेचा वार्षिक कार्यक्रम दिनांक २८ जानेवारी २०२५ ला पार पडला. यावेळी विद्यार्थ्यांच्या प्रतिभेचे नेत्रदीपक सादरीकरण करण्यात आले. या कार्यक्रमात नृत्य, अभिनय, गायन, कविता वाचन, मल्लखांब, तायक्वांदो, कबड्डी आणि लठ्ठिकाठी यासह विविध सादरीकरणे एकाच व्यासपीठावर करण्यात आली. यावर्षीची शिक्षण विभागातर्फे घोषित केलेली उत्कृष्ट शाळेची ट्रॉफी विद्यानिधी मराठी माध्यमिक विभागाला मिळालेली असल्याने एक वेगळाच उत्साह वातावरणामध्ये पसरलेला होता.
इनर व्हील क्लब मुंबई टीयाराच्या अध्यक्षा कुंती गाला आणि माजी विद्यार्थी सुजित शिंदे यांनी पाहुणे म्हणून कार्यक्रमाची शोभा वाढवली. त्यांनी विद्यार्थ्यांना स्वतःवर विश्वास ठेवण्यास आणि नवीन क्षितिजे शोधण्यास प्रेरित केले. या कार्यक्रमाला उपनगर शिक्षण मंडळ अध्यक्ष संजीव मंत्री आणि संचालक मंडळाचे सदस्य दाभोळकर आणि उपनगर शिक्षण मंडळाच्या विविध संस्थांचे प्रमुख उपस्थित होते.
संपूर्ण कार्यक्रमात असलेली एक सकारात्मक ऊर्जा ही पालकांच्या विश्वासाची आणि विद्यार्थी, शिक्षक आणि व्यवस्थापन सदस्यांच्या आत्मविश्वासाची प्रतीक होती.