गुरुकुलच्या नव्या प्रवासापासून तारिणीच्या धाडसी मोहिमेपर्यंत, झी मराठीच्या मालिकांमध्ये घडणार महत्त्वाच्या घडामोडी!

मुंबई:मनोरंजनाच्या दुनियेत प्रेक्षकांना खिळवून ठेवणाऱ्या झी मराठीवरील मालिकांमध्ये सध्या अनेक मनोरंजक घडामोडी घडत आहेत. गुरुकुलला मिळणारी नवी जागा, आनंदीचा परदेशात शिक्षणासाठी जाण्याचा निर्णय, राधिका आणि वेदांत यांच्यातील जवळीक, तर तारिणीसमोर उभे राहणारे नवे आव्हान अशा अनेक घडामोडींमुळे हा आठवडा प्रेक्षकांसाठी खास ठरणार आहे. जाणून घेऊया, झी मराठीच्या मालिकांमध्ये या आठवड्यात काय घडणार आहे.

‘सावळ्याची जणू सावली’मध्ये बालदिनानिमित्त अबीर आणि ओवी गुरुकुलमधील मुलांसोबत आनंदाने हा दिवस साजरा करतात. या आनंदाच्या वातावरणात सावली गुरुकुलसाठी नवीन जागा मिळवण्यात यशस्वी होते आणि सर्वांसाठी ही आनंदाची बातमी ठरते. नव्या जागेवरील गुरुकुलच्या पहिल्याच दिवशी वाडेकर एक मोठी खेळी खेळतात. गुरुकुलचा नवा मालक असल्याची घोषणा करून ते सर्वांनाच धक्का देतात. वाडेकरांच्या या निर्णयामुळे आता गुरुकुलसमोर कोणती नवी आव्हाने उभी राहणार, हे पाहणे महत्त्वाचे ठरणार आहे.

‘लक्ष्मी निवास’ मध्ये नात्यांचे नवे पदर उलगडताना दिसणार आहेत. रमा पहिल्यांदाच सिद्धूला ‘बाबा’ म्हणून हाक मारते. दुसरीकडे, जयंत जान्हवीला न सांगता गुपचूप जानूला भेटायला जातो. पाडव्याला जान्हवी आणि भाऊबीजेला लक्ष्मी असे दोघींकडूनही दिग्विजयचे औक्षण केले जाणार आहे. याचदरम्यान, आनंदी परदेशात जाऊन उच्च शिक्षण घेण्याची इच्छा व्यक्त करते. मात्र, सिद्धू आणि भावना तिच्या या निर्णयाला विरोध करतात. त्यामुळे नाराज झालेली आनंदी घर सोडून लक्ष्मीकडे राहायला जाते. तिच्या या निर्णयामुळे सिद्धू आणि भावना यांच्यात मोठे भांडण होणार आहे. आनंदीच्या निर्णयामुळे कुटुंबातील नात्यांमध्ये कोणते नवे वळण येणार, याची उत्सुकता आहे.

‘धाकट्या सुनेबाई’ मालिकेत पाणीदानाचा ट्रॅक सध्या महत्त्वाच्या वळणावर आहे. गावकऱ्यांना पाण्यासाठी करावा लागणारा संघर्ष आणि टँकरवरून निर्माण झालेला वाद यामुळे गावातील वातावरण तापले आहे. या सगळ्या घडामोडींदरम्यान राधिका आणि वेदांत यांच्यातील प्रेमळ, भावनिक आणि काही खट्याळ क्षणही पाहायला मिळणार आहेत. पाडव्याच्या निमित्ताने वेदांतच्या प्रोत्साहनामुळे राधिका पहिल्यांदाच सर्वांसमोर बासरी वाजवणार आहे. दुसरीकडे, गोदाक्का राधिकाच्या लग्नाची तयारी आणि जुळवाजुळव करण्यास सुरुवात करते. त्यामुळे राधिकाच्या आयुष्यात आता कोणती नवी आव्हाने येणार, हे पाहणे रंजक ठरेल.

‘कृष्णाईच्या लेकी’ मध्ये कृष्णाई घरी परतल्यानंतर तिला लक्ष्मीपूजन करण्याचा आग्रह केला जातो. पूजेदरम्यान अशक्तपणामुळे तिचे हात थरथरू लागतात. तेव्हा शंकर आणि गौरी तिचे हात घट्ट धरून तिला आधार देतात. दुसरीकडे, फराळ घेऊन गौरीला मातोश्रींच्या घरी पाठवले जाते. जिगीषाच्या सांगण्यावरून गौरीच्या पायांचे ठसे मातोश्रींच्या घरात उमटतात. भाऊबीजेच्या निमित्ताने इंदुराणी आपल्या पतीला कृष्णाईच्या दारात घेऊन येते आणि त्याचे औक्षण करते. यावेळी तिन्ही मुली आपल्या आईला पदव्या आणि आयुष्यात मिळवलेल्या यशाच्या रूपात अनोखी ओवाळणी देतात. आई आणि मुलींच्या नात्यातील हा भावनिक क्षण प्रेक्षकांना पाहायला मिळणार आहे.

‘कमळी’ मालिकेत अन्नपूर्णा आजी घरात फॅमिली बोर्ड मीटिंग बोलावते. त्यामुळे घरातील वातावरणात उत्सुकतेसोबतच तणावही निर्माण होतो. दुसरीकडे, ऋषी बंडखोर वृत्तीने कमळीसोबत आपल्या कॉलेजच्या प्रोजेक्टवर काम करण्यास सुरुवात करतो. या निमित्ताने दोघांमधील जवळीक वाढू लागते. मात्र, ऋषी आणि कमळीला एकत्र पाहून नयनताराला मोठा धक्का बसतो. तिच्या मनात नाराजी आणि गैरसमज निर्माण होतात. त्यामुळे आता या तिघांच्या आयुष्यात कोणते नवे भावनिक वळण येणार, हे पाहणे महत्त्वाचे ठरणार आहे.

‘तारिणी’ मालिकेत भाऊबीजेच्या निमित्ताने एक मोठी घटना घडते. युवराज कौशिकीचा अपमान करतो. मात्र, केदारला हे सहन होत नाही आणि तो युवराजच्या कानाखाली लगावतो. दिवाळीनंतर कव्याच्या साखरपुड्याची तयारी सुरू असतानाच तारिणीसमोर एक नवे आव्हान उभे राहते. शाळेच्या बसमध्ये ओलीस ठेवलेल्या मुलांची सुटका करण्याची महत्त्वाची जबाबदारी तारिणीवर सोपवली जाते. दुसरीकडे, आता सीईओ झालेला दयानंद याच्या परवानगीने युवराज या घटनेचे अतिरंजित वार्तांकन करतो. त्यामुळे या प्रकरणात तारिणीला कोणत्या अडचणींचा सामना करावा लागणार आणि ती या मुलांची सुखरूप सुटका कशी करणार, हे पाहणे थरारक ठरणार आहे.

प्रत्येक मालिकेतील या नव्या वळणांमुळे पुढे काय घडणार, याची उत्सुकता नक्कीच वाढणार आहे. तेव्हा पाहायला विसरू नका, आपल्या आवडत्या मालिका फक्त झी मराठीवर!