मुंबई : ओमरॉन हेल्थकेअर कंपनी लिमिटेड या होम हेल्थकेअर मॉनिटरिंग क्षेत्रातील अग्रेसर कंपनीच्या ओमरॉन हेल्थकेअर इंडिया या भारतातील प्रादेशिक मुख्यालयाने दूरस्थ होम हार्ट मॉनिटरिंग अँड मॅनेजमेंट क्षेत्रात प्रवेशाची घोषणा केली आहे. ट्रायकॉग या आघाडीच्या हार्ट हेल्थ एआय कंपनीशी ओमरॉन हेल्थकेअर इंडियाने भागीदारी केली आहे. ट्रायकॉग ही हृदविकारांचे लवकर निदान आणि व्यवस्थापन यांवर लक्ष केंद्रित करणारी भारतीय बाजारपेठेतील कंपनी आहे.
ट्रायकेअर हा दूरस्थ रुग्ण व्यवस्थापन प्लॅटफॉर्म आणून देशातील कार्डिओव्हस्क्युलर विकारांच्या व्यवस्थापन परिसंस्थेत सुधारणा करणे हे या प्रयत्नामागील उद्दिष्ट आहे.या प्लॅटफॉर्मद्वारे ओमरॉनच्या कनेक्टेड देखरेख उपकरणांची सांगड ट्रायकॉगच्या एआयवर आधारित आरोग्यविषयक डेटा विश्लेषण क्षमतांशी घातली जाणार आहे.
मूल्यविधान
हृदयविकारांवर घरच्या घरी देखरेख शक्य करणारे तंत्रज्ञान उपलब्ध करून देण्याचे उद्दिष्ट या सहयोगापुढे आहे. त्याचप्रमाणे एआयच्या सहाय्याने वेळेत हस्तक्षेप करून, मृत्यू तसेच विकलांगतांना कारणीभूत ठरणाऱ्या, तातडीच्या आणि पूर्तता न होणाऱ्या गरजांवर लक्ष केंद्रित करण्याचेही उद्दिष्ट आहे. यामध्ये लक्षणे आणि आजारांच्या निदानाला विलंब करणाऱ्या परिस्थितीचा (दुय्यम आरोग्यसेवा स्तरावरील रुग्णांसाठी) समावेश होतो. या परिस्थितीमुळे उच्च रक्तदाबाच्या रुग्णांमध्ये हार्ट फेल्युअरसारख्या कार्डिओव्हस्क्युलर घटना होऊ शकतात.
कार्डिओव्हस्क्युलर विकारांबाबतच्या पूर्तता न झालेल्या गरजा…
● कार्डिओव्हस्क्युलर आजारांमुळे (सीव्हीडी) मृत्युमुखी पडणाऱ्यांच्या संख्येबाबत भारताचा क्रमांक जगात दुसरा आहे.
● भारतातील चारपैकी एका प्रौढाला उच्च रक्तदाबाचा (हायपरटेन्शन) त्रास असतो आणि त्यापैकी केवळ 22.5% रुग्णांचा रक्तदाब नियंत्रणात असतो . त्यामुळे त्यांना हृदयविकाराचा धक्का बसण्याचा किंवा मायोकार्डिअल इन्फार्क्शन (एमआय) होण्याचा, पक्षाघाताचा झटका येण्याचा किंवा सेरेब्रोव्हस्क्युलर आघात होण्याचा, अट्रियल फिब्रिलेशन (एएफ) तसेच हार्ट फेल्युअरचा धोका अधिक असतो.
● भारतातील ४० -६९ या वयोगटातील ४५ % लोकांना कार्डिओव्हस्क्युलर आजारांचा धोका आहे आणि एकूण मृत्यूंमध्ये या विकारांनी होणाऱ्या मृत्यूंचे प्रमाण २७% आहे. भारतात हार्ट फेल्युअरचे प्रमाण वेगाने वाढत आहे. या आजाराचे १.३ ते ४.६ दशलक्ष रुग्ण असावेत असा अंदाज आहे.
● १.८ दशलक्ष रुग्णांना दरवर्षी रुग्णालयात दाखल करावे लागते, तर १ वर्षात मृत्यूचे प्रमाण सुमारे ४०% आहे. यापैकी १ टक्क्याहून कमी रुग्णांना योग्य वैद्यकीय व्यवस्थापनाची सुविधा प्राप्त होते. त्यामुळे दूरस्थ पद्धतीने रुग्णांचे व्यवस्थापन करण्याच्या आवश्यकतेमध्ये मोठी संभाव्यता आहे.
लक्षणांचे नियमित मापन, महत्त्वाचे निकष आणि घरात ईसीजी काढण्याची सोय यामुळे कार्डिओव्हस्क्युलर विकारांचे प्रमाण कमी होऊ शकते. मात्र, ईसीजी मापन उपकरणांची रुग्णालये आणि क्लिनिक्समधील कमतरता, क्लिनिकल डेटाचा अर्थ लावणाऱ्या कार्डिओलॉजिस्ट्सची अनियमित उपलब्धता अशा विविध घटकांमुळे यात अनेक आव्हाने आहेत. त्याचप्रमाणे अधिक अचूक आणि वापरासाठी सुलभ अशा होम मॉनिटरिंग उपकरणांची आवश्यकता आहे. घरच्या घरी ईसीजी नोंदवून घेणे देशात जवळपास अस्तित्वातच नाही; हायपर टेन्शनचे म्हणजेच उच्च रक्तदाबाचे रुग्ण सहसा त्यांच्या प्रकृतीबाबत बेसावध राहतात, त्यामुळे प्रकृती खालावत जाते किंवा एखाद्या गंभीर विकाराचा आघात होतो.
आरोग्यसेवा पोहोचवण्यासाठी नवीन पद्धती निर्माण करणे:
● ट्रायकेअर टीम रुग्णांना व त्यांची काळजी घेणाऱ्यांना हार्ट फेल्युअर व्यवस्थापनाबाबत शिक्षित करते आणि ओमरॉन बीपी मॉनिटर्स, वजन तसेच ईसीजी मापन उपकरणांशी जोडलेले मोबाइल अॅप्लिकेशन (ओमरॉन कनेक्ट) कसे वापरायचे याचेही शिक्षण देते.
● दररोज ईसीजी घेण्यासोबतच घरातून लक्षणे नोंदवण्यासाठी तसेच महत्त्वाच्या खुणांचे मापन करण्यासाठी, ट्रायकेअर टीम रुग्णांना आभासी (व्हर्च्युअल) पद्धतीने मदत करते.
● ट्रायकॉगने स्वत: विकसित केलेल्या तंत्रज्ञानाचा उपयोग करून, टीम प्राणघातक स्थितींचे दूरस्थ निदान करण्याच्या दृष्टीने रुग्णाच्या नोंदींवर देखरेख ठेवते आणि डेटाचे विश्लेषण करते. त्याचप्रमाणे रुग्णालयाशी समन्वय साधून उपचार देतानाच, जटीलता निर्माण होण्यापूर्वीच त्या टाळण्यासाठी कृती सुरू करते.
‘रक्तदाब आणि व्यक्तिगत आरोग्य देखरेख क्षेत्रात एआयवर आधारित विविध आरोग्यसेवा उपयोजनांमध्ये समन्वय साधल्यानंतर, ओमरॉनने आपले कार्यक्षेत्र होम हार्ट मॉनिटरिंग आणि व्यवस्थापन क्षेत्रांत विस्तारण्याच्या दृष्टीने टाकलेले हे आणखी एक लक्षणीय पाऊल आहे. ट्रायकॉगसारख्या योग्य सहयोगीची साथ मिळाल्यामुळे, भारतीय कार्डिओव्हस्क्युलर आरोग्यसेवा क्षेत्रात आम्ही मोठा बदल घडवून आणू शकू, अशी आशा आम्हाला वाटते. कारण, घरच्या घरी ईसीजीचे मापन करणे आणि कार्डिओलॉजिस्टला सातत्याने माहिती देत राहणे यामुळे सेरेब्रोव्हस्क्युलर आजारांचे प्रचलन, पारंपरिक रुग्णालयकेंद्री ईसीजी मापन पद्धतीच्या तुलनेत, नक्कीच कमी होऊ शकते असा विश्वास आम्हाला वाटतो. यामुळे दीर्घकाळात वैद्यकीय-आर्थिक आधारावरील मोठे सामाजिक मूल्य राष्ट्रासाठी तयार होईल. कारण, या आजारांचे प्रचलन कमी झाल्यामुळे दरडोई आरोग्यसेवेवरील खर्चात मोठी कपात होईल,’ असे ओमरॉन हेल्थकेअर इंडियाच्या न्यू बिझनेस अँड मार्केटिंग विभागाचे व्यवस्थापक कात्सुयुकी यामामोतो सांगतात.
‘कार्डिओव्हस्क्युलर आजारांमुळे होणाऱ्या १९ दशलक्ष मृत्यूंपैकी ५० टक्के मृत्यू, लवकर निदान आणि सुयोग्य व्यवस्थापन यांमुळे, टाळले जाऊ शकतात. ट्रायकेअर या ओमरॉनच्या सहयोगाने विकसित करण्यात आलेल्या अशा प्रकारच्या पहिल्याच दूरस्थ रुग्ण व्यवस्थापन प्लॅटफॉर्मच्या माध्यमातून आम्ही प्रत्येक हृदयविकार रुग्णाच्या घरी आभासी कार्डिओलॉजिस्ट ठेवू शकतो. जागतिक दर्जाची वैद्यकीय श्रेणी उपकरणे विकसित करण्याचा अनेक दशकांचा अनुभव ओमरॉनकडे आहे आणि जगातील लक्षावधी लोकांचा त्यांच्यावर विश्वास आहे. रुग्णांवर देखरेख ठेवण्यासाठी आमच्या जागतिक दर्जाच्या एआयचे पाठबळ लाभलेल्या ट्रायकेअर प्लॅटफॉर्ममध्ये केवळ भारतातीलच नव्हे जगभरातील लक्षावधी आयुष्यांमध्ये बदल घडवून आणण्याची क्षमता आहे,’ असे ट्रायकॉग हेल्थचे संस्थापक आणि मुख्य कार्यकारी अधिकारी डॉ. चरित भोगराज सांगतात.
संदर्भ:
१. रोथ जी, मेन्सा जी, जॉन्सन सी आणि अन्य. ग्लोबल बर्डन ऑफ कार्डिओव्हस्क्युलर डिसीजेस अँड रिस्क फॅक्टर्स, १९९० -२०१९ जे एएम कॉल कार्डिओल. २०२० डिसेंबर, ७६(२५) २९८२-३०२१
२. जागतिक आरोग्य संघटना (वर्ल्ड हेल्थ ऑर्गनायझेशन) जागतिक आरोग्य सांख्यिकी २०१६: मॉनिटरिंग हेल्थ फॉर द एसडीजीज सस्टेनेबल डेव्हलपमेंट गोल्स. वर्ल्ड हेल्थ ऑर्गनायझेशन; ८ जून २०१६
३. गेल्डसेट्झर पी, माने-गोहलर जे, थीलमान एम आणि अन्य. डायबिटीस अँड हायपरटेन्शन इन इंडिया: १.३ दशलक्ष प्रौढांचा एक राष्ट्रीय स्तरावरील प्रानिधिक अभ्यास. जेएएमए इंटर्न मेड. २०१८;१७८(३):३६३-३७२
४. कोया एसएफ, पिलाक्कडवथ झेड, चंद्रन पी, विल्सन टी, कुरियाकोज एस, अकबर एसके, अली ए. हायपरटेन्शन कंट्रोल रेट इन इंडिया: सिस्टमॅटिक रिव्ह्यू अँड मेटा-अॅनालिसिस ऑफ पॉप्युलेशन-लेव्हल नॉन-इंटरव्हेन्शनल स्टडीज, २००१-२०२२. द लॅन्सेट रिजनल हेल्थ- साउथईस्ट आशिया. १ फेब्रुवारी २०२३, ९:१००११३ .
५.हफमन, एम. डी. अँड प्रभाकरन, डी. (२०१०). हार्ट फेल्युअर: एपिडेमिओलॉजी अँड प्रिव्हेन्शन इन इंडिया. द नॅशनल मेडिकल जर्नल ऑफ इंडिया, २३(५), २८३.
६.डोकायनिश, एच., टिओ, के., झु, जे., रॉय, ए., अलहबिब, के. एफ., एलसयद, ए., … अँड मोंदो, सी. (२०१७). ग्लोबल मोरटॅलिटी व्हेरिएशन्स इन पेशंट्स विथ हार्ट फेल्युअर: इंटरनॅशनल कंजेस्टिव हार्ट फेल्युअर (इंटर-सीएचएफ) संभाव्य समूह अभ्यास. द लॅन्सेट ग्लोबल हेल्थ, 5(7), e665-e672.
ओमरॉन हेल्थकेअर आणि त्यांच्या भारतातील व्यवसायाविषयी…
प्रगत आरोग्य तसेच जगभरातील लोकांना संपूर्ण क्षमतेने आयुष्य जगण्यासाठी सक्षम करण्याप्रती बांधील असलेली ओमरॉन हेल्थकेअर ही, होम हेल्थ मॉनिटरिंग आणि थेरपी क्षेत्रातील क्लिनिकल स्तरावर गुणवत्ता सिद्ध केलेल्या नवोन्मेषकारी वैद्यकीय उपकरणांची, जागतिक स्तरावरील, आघाडीची कंपनी आहे.
आपल्या संपूर्ण कार्यकाळात ओमरॉन हेल्थकेअर ही कंपनी, ११०हून अधिक देशांतील लोकांना त्यांची आयुष्ये सुधारण्यासाठी तसेच घरी आणि क्लिनिकमध्ये वैद्यकीय अवस्थांचा प्रतिबंध करण्यात, त्यांवर उपचार करण्यात, त्यांचे व्यवस्थापन करण्यात मदत करणारी नवोन्मेषकारी उत्पादने विकसित करून अधिक चांगल्या समाजाच्या दृष्टीने योगदान देण्यासाठी प्रयत्नशील आहे.
कंपनीच्या प्रमुख उत्पादन प्रवर्गात डिजिटल रक्तदाब देखरेख उपकरणे, श्वसनाची काळजी घेणारी उपकरणे, वेदना व्यवस्थापन उपकरणे आणि स्वास्थ्यकारी उत्पादने यांचा समावेश होतो. २०१० मध्ये स्थापन झालेली ओमरॉन हेल्थकेअर इंडिया ही कंपनी देशातील होम हेल्थकेअर मॉनिटरिंग क्षेत्रातील महत्त्वाची कंपनी आहे. उच्च दर्जाचे रक्तदाब मॉनिटर्स, श्वसन उपचार उपकरणे, बॉडी फॅट मॉनिटर्स, डिजिटल थर्मामीटर्स (तापमापक), वेदना व्यवस्थापन उपकरणे आदी उत्पादने कंपनी पुरवत आहे.