तंजावर: ‘नाटककार शहाजी (शाहराज) राजे भोसले हे मराठी रंगभूमीचे पहिले नाटककार असून ,’लक्ष्मी नारायण कल्याण’ हे पहिले मराठी नाटक होय, असे उद् गार ९९ व्या नाट्य संमेलनाचे अध्यक्ष प्रेमानंद गज्वी यांनी तंजावर इथल्या सरस्वती महालात संपन्न झालेल्या कार्यक्रमात काढले.
तंजावर येथे १०० व्या अखिल भारतीय मराठी नाट्य संमेलनाचा प्रारंभ शाहराज राजे भोसले यांच्या वाङमयाला वंदन करून आणि नटराज पूजन करुन करण्यात आले. कार्यक्रमाच्या अध्यक्षस्थानी तामिळ विद्यापीठाचे कुलगुरू प्रो. तुरूवेल्लुवन,प्रमुख अतिथी जिल्हाधिकारी दीपक जेकब उपस्थित होते. यानिमित्तानं नाट्य, नृत्य, गायन कार्यक्रम सादर करण्यात आलं.
नाटककार शहाजी (शाहराज) राजे भोसले यांच्या ‘लक्ष्मी नारायण कल्याण’ या नाटकातील एक प्रवेश ९९ व्या नाट्यसंमेलनाध्यक्ष प्रेमानंद गज्वी आणि कोषाध्यक्ष सतीश लोटके सादर केला. रसिक प्रेक्षकांनी कार्यक्रमाला उस्फुर्त प्रतिसाद दिला. कार्यक्रमाचे सूत्रसंचालन विवेकानंद गोपाळ यांनी केले.
‘शाहराजांनी २२ मराठी,२० तेलगु, १ संस्कृत,१ तमिळ आणि ३ हिंदी नांके लिहिली असून ते मराठी रंगभूमी बरोबरच तामिळ आणि हिंदी रंगभूमीचेही आद्य नाटककार होते. ते काव्य भाषा शास्त्राचे अभ्यासक होते. त्यांनी बारामास आणि षडरूतुवर्णन ही काव्ये लिहिली असून ते शूर, राजकारणपटू रसिक, कलाज्ञानी आणि नृत्य कलेचे मर्मज्ञ होते.’ असं प्रेमानंद गज्वी म्हणाले.
शिवाजी राजे भोसले म्हणाले, ‘मी व्यंकोजी राजघराण्यातील आठवा वारसदार आहे याचा मला मोठा अभिमान आहे. राजांच्या मुळंच मला सन्मान मिळत आला. १०० व्या नाट्य संमेलनाचे निमित्तानं महाराष्ट्रातून अखिल भारतीय मराठी नाट्य परिषदचे पदाधिकारी इथं तंजावरला आले. ९९ व्या नाट्य संमेलनाचे अध्यक्ष नाटककार प्रेमानंद गज्वी स्वत: शाहराजांना वंदन करायला इथं आले. नाट्य परिषदेचे कोषाध्यक्ष सतीश लोटके कार्यकारी समिती सदस्य गिरीश महाजन, नियामक मंडळ सदस्यआनंद कुलकर्णी तंजावर इथं आले याचा खूप आनंद झाला आहे.’